الحلقة الأولي "تنويم مغناطيسي ! "

" تنويم مغناطيسي .. ! "

                                                             ..            

ببساطة شديدة .. شايف أن فكرة مين مع الإخوان أو مين ضد الإخوان دي بقت مادة متهالكة أوي في ظل كل اللي وصلنا له . لأنك زي ما بيقولوا المعلقين في ماتشات الكرة علي أساس أننا شعب أكتر لغة بيفهمها هي الكرة فأنت لو كنت قاعد علي اليمين في المدرجات هتشوف الأخوان كويس أوي وكمان بردو هتشوف الأوضاع الاقتصادية والسياسيات المتخبطة والقرارات المغلوطة في الأونة الاخيرة !! ومننكرش تردي الوضع الاقتصادي وكله مش بسبب مبارك بس اكيد الفترة الحالية ليها دور بردو ( بس أكيد مش هتتكلم ولا هتقول كدا ) ... ولو كنت قاعد علي الشمال في المدرجات هتشوف جبهة الإنقاذ وكل القوي المعارضة للإخوان اللي واقفين يتخانقوا مع بعض وكل شوية تضيع منهم جولة ويفضلوا يتخانقوا بردو علي اللي بعدها لحد ما تضيع  أو ممكن تشوف ربما الشعب مش قادر يساندهم أو فيه خلل في شئ ما  .

التاريخ بقي  هو الحكم .. لكن غريبة أن عينه في حتة تانية خالص ، عينه علي الانسان المصري  كانسان مصري غير مصنف سياسياً لا اخوان ولا غير اخوان .. الانسان هو اللي بيقدر يبني أي حضارة وأي امبراطوية واي دولة قوية .. مش القوانين ولا الدساتير ولا نظم الحكم ولامين اللي هيحكم !! . إنما الانسان نفسه هو نواة ولبنة أي بناء قوي يدوم لسنوات طويلة عميق الأثر والمغزي .. الانسان الواعي هو أقوي اكسير لدورة حياة أي حضارة عرفناها ...  وخلونا ندي مثال من الدين الاسلامي علي حد علمي المتواضع بردو كمسلم والله أن الرسالة نزلت علي سيدنا محمد صلي الله عليه وسلم ومكنش زعيم قبيلة قريش وقتها ولا ربنا سبحانه وتعالي هيئ له مثلا رئاسة دولة ولا النبي صلي الله عليه وسلم سعي الأول عشان يبقي زعيم قريش عشان يعرف ينشر رسالته .. لكن لا  كان ضعيف مش قادر يحمي نفسه ولا اتباع رسالته المجيدة وقتها . بس قدر بمشيئة ربنا عزوجل يبني داخل الانسان إيمان قوي  بالفكرة والرسالة وهو الانسان دا اللي قبل التضحية والتعذيب والهجرة عشان الفكرة وايمانه بيها ، وهو نفسه الانسان اللي قدر مع النبي صلي الله عليه وسلم يبني اكبر امبراطورية ودولة اسلامية في عهده وعهد الخلفاء الراشدين طالت مشارق الأرض ومغاربها ووصلت لكل انسان  كان عايش علي الكرة الارضية وقتها !!! . اذن الفكرة بقي في انسان مؤمن برسالته وعلي قدرته لإستيعاب الوعي الكافي لرؤية واضحة للطريق الصحيح اللي هي رؤيته  .

ـ وعشان تقدر تستوعب دا لازم تعرف ان كل واحد مننا هيبقي عنده وعي خاص بيه وإيمان متعمق بيوجهوه لرؤية مختلفة بردو . لان نقاط تحركنا وتكوينا مش واحدة .. بس لاننا كلنا في نفس الطريق (الحياة والبلد يعني ) فأحب افكرك أن أي طريق فيه أكتر من حارة وأنت اختار الحارة اللي تريحك وامشي فيها لو شايف انها هتوصلك للحق والصح ، المهم مش عشان انا مش همشي وراك في نفس حارتك تصدمني أو تخرجني خالص من الطريق ... لأنك بكدا هتوقف الطريق كله !!! . والنظام الحقيقي أننا نمشي في طريق واحد وجنب بعض مهما اختلفت غايات الوصول والنهاية . مش بالتصادم ولا الزعيق ولا بالشتيمة ! . بالاحترام ممكن تبقي اقوي كتير علي فكرة .

ـ مش عاوز ابان أني رومانسي وأنا بتكلم عن الوعي والنظام وبناء وعي انسان جديد ! خالص علي فكرة دا فيه دول زينا في الاقتصاد والثقافة والفكر وقدرت تحقق دا  .. وخد بالك بما اننا في دولة الدين فيها عامل مؤثر واحنا المفروض شعب متدين (قالوا لينا كدا في كتب المدرسة زمان )  يبقي لازم نفهم ومن غير ما ابقي شيخ ولا بطلع علي قناة الحافظ يعني ، اقدر اقولك كمسلم كدا ان ربنا عز وجل اللي خلقني وخلقك  قال في كتابه العزيز (لا إكراه في الدين ... ) والدين دا اللي ربنا عز وجل قال عليه بردو ( إن الدين عند الله الاسلام ...) يعني حتي في شئ راسخ في عقيدتنا إن الدين واحد وهو الاسلام وهو الحق الوحيد  بردوهاحترم الاخر وأنا عارف انه غلط بس: (لكم دينكم وليّ دين .... ) وربنا شايف وعارف وقادر سبحانه وتعالي ،،، لله الأمر من قبل ومن بعد  ...  عارف ناس هتقول (من رآي منكم منكراً فليغيره ..... ) جميل جداً اننا نغير ونمحو المنكر من مجتمعاتنا ونبقي شعب وناس أقل في المنكرات وزيادة في المعروف محدش يقدر يعارض في كدا أبداً ...  بس السؤال هنا  : ما هو تعريف المنكر عندك بالظبط ؟!!  وهتغيره ازاي ؟!! وأنت مين ياللي هتغيره ؟!! ...

مش ممكن تكون زي (الذين يأمرون الناس بالمعروف وينسون أنفسهم ) ؟ ... استني كدا فكرتني بحاجة مهمة ،  فيه ناس كدا كتيرة أوي الأيام دي بتطالب بتغيير المنكر من وجهة نظرهم وتغيير الناس اللي بتعمل المنكر دا بردو من وجهة نظرهم  ، مع أنهم بيستخدموا نفس مواقف وأدوات الناس اللي عاوزين يغيروهم !!!

يعني اسمح ليا اديك تشبيه مجازي كدا .. لو اعتبرنا أن السياسة طاولة واحدة وكل القوي السياسية قاعدة بتلعب .. هتلاقي قوي التيار الاسلامي مثلا يعني بتلعب معاهم علي نفس الترابيزة وبنفس الكوتشينة !!

بس الفرق عند دور الآخرين في اللعب بتقول : " دا حرام وميسر ! "  وعند دورها هي بتعطي مبررات ومسميات وديعة أوي منها مثلا: ( دي رسوم إدارية مش ربا قروض ) (دي نصرة شريعة .. مش تهافت ع السلطة ولا تحالف مع الشيطان حتي ) ( دول أعداء الشريعة .. مش قتل ولا بلطجة نهائي ) ......

ـ بقت المشكلة إن  أي حد تاني هيلعب غيرهم ( خارج حارتهم يعني ) هيبقي غير وطني وعدو الله ـ حاشا لله ـ ويمكن يكون خاين وجاسوس وعميل  ... لكن هما كتيار اسلامي  يعني بيلعبوا بنفس أدواتهم اللي مفروض عاوزين يغيروها كمنكر  والعن كمان  .. كأحزاب وإنتخابات وتحالفات وقروض ومظاهرات وشتائم  وبلطجة  ونفس السياسيات ونفس الاستراتيجيات بس تحت مسمي ديني جميل وسيم رشيق وعليه ختم كام فتوي شرعية معرفش جت منين !!

ـ طيب لو كان الأمر نصرة شريعة بقي وتغيير المنكر ... فبردو اللي أعرفه ان الدين الاسلامي ضد التحزب وضد تشييع الأمة الي فرق .؟؟؟ يعني المفروض بردو أن حضرات القوي الإسلامية هم أول ناس مفروض يتغيروا !! لنصرة الشريعة الاسلامية .! ( علي أساس أنهم من الفرق المبتدعة في الدين اللي عاوزين ينصروه !!!!!!!!! ).

ـ لكن المشكلة الحقيقية مش في التيار الإسلامي السياسي ولا الدساتير ولا الحكم ولا جبهة إنقاذ  ولا جبهة غرق ولا كل الكلام دا .. المشكلة هي انسان مصري عاش 30 سنة في حكم ظالم قابع تحت تنويم مغناطيسي  لعبارات كدا زي: ( اللي نعرفه احسن من اللي منعرفوش ! ) ( صاحب أول طلعة جوية )      ( اختارناه اختارناه ) ( لو مشي مبارك اسرائيل هتحارب مصر وتدخلها ) ( الامن والامان .... )

وفي الاخر اكتشف الانسان المصري الغلبان أنه ميعرفش مبارك خالص وقلت قبل كدا في مقال سابق إن جدتي المصرية جداً " بكت علي مبارك يوم ما قال عاوز أموت في البلد دي هي نفسها اللي دعت عليه يوم ما عرفت كم وهول الفساد اللي عمله طول فترته ضد البلد وشبابها" .. وزي كل المصريين اللي كانوا مصدقين وهم الأمن والأمان واللي كانوا عارفين أنهم ماختروهووش ولا كان ليهم صوت أصلاً  وعرفوا أنه مش  صاحب أول طلعة جوية ولا حاجة ... وكمان اسرائيل محاربتش مصر لما مشي دي بالعكس لقت ليها حليف جديد/ قديم  بشكل مقدس ودقن  !!

والأخطر بقي أن الانسان المصري دا الغلبان جدا اللي عاش  30 سنة قهر أول ما فاق من التنويم المغناطيسي  مرة كدا فعمل ثورة  ،،، وفجاة  ،،، مقدرش يستحمل كتير يبقي فايق وصاحي ،،، راح داخل في نوم مغناطيسي تاني ألعن وأقوي .. وناس كانت مجهزة نفسها عشان تنيم الشعب دا  بعباراتها الاكثر مغناطيسية  كانت جاهزة وبشكل ديني عاطفي جداً .... ( نصرة الشريعة الاسلامية) !!!

وبكدا يلهوا شعب كامل بدوامة مين واقف في صفهم عشان يبقي من المؤمنين ،،، ومين واقف في أي صف تاني  عشان يبقي من الكفار !!!  .. حتي لو كانوا الصفين دول واقفين في  نفس الصلاة الواحدة ، اللي هي  في نفس المسجد الواحد ، اللي هو في نفس البلد الواحدة !! .

بس السؤال  الصعب بقي : الشعب دا هيفضل نايم كام سنة مغناطيسياً عشان بردو يعرف أنهم مكنوش عاوزين لا ينصروا شريعة ولا حاجة ؟؟!!،،، ولو مفروض يفوق :  يبقي أيه هو العلاج ؟ .

...

نلقاكم في الحلقة الثانية إن شاء الله

كريم بهي

مصري ( غير مصنف سياسياً)

فبراير 2013